उद्धव संदेश- Par First of Soor sagar

उद्धव संदेश

          

अंतरजामी कुंवर कन्हाई ।

गुरु गृह पढ़त हुते जहँ विद्या, तहँ ब्रज-बासिनि की सुधि आई ॥

गुरु सौं कह्यौ जोरि कर दोऊ, दछिना कहौ सो देउँ मँगाई ।

गुरु-पतनी कह्यौ पुत्र हमारे, मृतक भये सो देहु जिवाई ॥

आनि दिए गुरु-सुत जमपुर तैं, तब गुरुदेव असीस सुनाई ।

सूरदास प्रभु आइ मधुपुरी, ऊधौ कौं ब्रज दियौ पठाई ॥1॥

जदुपति जानि उद्धव रीति ।

जिहिं प्रगट निज सखा कहियत, करत भाव अनीति ॥

बिरह दुख जहँ नाहिं-नैकहूँ, तहँ न उपजै प्रेम ।

रेख, रूप न बरन जाकैं, इहिं धर्यौ वह नेम ॥

त्रिगुन तन करि लखत हमकौं, ब्रह्म मानत और ।

बिना गुना क्यौं पुहुमि उघरै, यह करत मन डौर ॥

बिरस रस के मंत्र कहुऐ, क्यौ, चलै संसार ।

कछु कहत यह एक प्रगटत, अति भर्यौ अहंकार ॥

प्रेम भजन न नैंकु याकौं, जाइ क्यौं समुझाइ ।

सूर प्रभु मन यहै आनी, ब्रजहिं देउँ पठाइ ॥2॥

   

संग मिलि कहौं कासौं बात ।

यह तौ कहत जोग की बातैं, जामै रस जरि जात ॥

कहत कहा पितु मातु कौन के, पुरुष नारि कह नात ।

कहाँ जसोदा सी है मैया, कहाँ नंद सम तात ॥

कहँ बृषभान-सुता सँग कौ सुख, वह बासर वह प्रात ।

सखी सखा सुख नहिं त्रिभुवन मैं, नहिं बैकुंठ सुहात ॥

वै बातें कहियै किहिं आगै, यह गुनि हरि पछितात ।

सूरदास प्रभु ब्रज महिमा कहि, लिकी बदत बल ब्रात ॥3॥

     

तबहिं उपंग-सुत आइ गए ।

सखा सखा कछु अंतर नाहीं, भरि भरि अंक लए ॥

अति सुन्दर तन स्याम सरीखो, देखत हरि पछिताने ।

ऐसे कैं वैसी बुधि होती, ब्रज पठऊँ मन आने ॥

या आगैं रस-कथा प्रकासौं, जोग-कथा प्रगटाऊँ ।

सूर ज्ञान याकौ दृढ़ करिकै, जुवतिन्ह पास पठाऊँ ॥4॥